กาพย์…อย่าลืมเมืองอีสานเขียว

กาพย์…อย่าลืมเมืองอีสานเขียว



ผู้ฟังเอย…
มาแล้วเด้อพี่น้องรายการเก่าของเฮาเอง
บ่มีลำบ่มีเพลงมีผญากับกลอนแหล่
เสียงแหลๆ เสียงนี้ หลานชายเจ้ารุ่งทวีแม่นจำได้หือได๋หน่อ
ฝากโยมแม่โยมพ่ออุปการะเลี้ยงชูอุ้มให้ชุ่มใจ
พี่น้องเอย…ฟังเดอเจ้า

นกจิดเฟือง ขาเหลืองอ่อยฮ่อย ฟังจักหน่อย ชาวภาคอีสาน
ฟังเสียงหลาน รุ่งทวีสิเว้า พวกหมู่เจ้า ปทุมราชวงศา
อยู่ท่งนา กินปลากินข้าว เจ้าอย่าฟ่าว ลืมฮีตลืมคอง
ลืมแจ่วบอง ข้าวเหนียวปลาแดก อย่าฟ่าวแตก ความสามัคคี
เป็นเศรษฐี อย่าลืมลุงป้า เห็นไฟฟ้า อย่าลืมกระบอง
ฝาแตบตอง กิ้วตอกบ่หมั๋น ได้อยู่ตึกเก้าซั้น อย่าลืมตูบลืมเถียง
อย่าลืมเขียง บ่วงจองมีดพร้า คันได้กินพิชซ่า และเคเอฟซี
อย่าพิตี๋ ลืมคุณปลาแดก ฉีกแคก-แคก ดูดฮอดนิ้วมือ
ใช้มือถือ อย่าลืมด้ามเกี่ยว อย่าลืมเสี่ยว ลึ้งแก่นหลายปี
ฟังกวี คำไทยม่วนแม้ง เจ้าอย่าแกล้ง ลืมความผญา
การศึกษา จบปริญญาเอก อย่าเอาไม้กอกเขก หัวหมู่ไทยเดียว
ดอกกระเจียว กินกับก้อยกุ้ง อย่าลืมเพลงลูกทุ่ง หมอลำหมอพิณ
คันเจ้าไปได้ยิน สตริงฝาหรั่ง อย่าสะลืมขี๋ครั่ง ติดอยู่เต้าแคน
นกแจนแวน มันฮ้องหาเจ้า กลางท่งข้าว เมืองอีสานเขียว
หันไปเหลียว เบิ่งดู้จักหว่าง ลองไปย่าง ไต่คันแทนา
ฟังเสียงปลา ค่อเข็งเส็งบ้อน น้ำล้นต้อน ขี๋ฟ้าหย่อนพวมแดง
ผักขะแยง ต้มใส่กบน้อย เย็นจ้อย-จ้อย ฝนหลั่งรินฮวย
อย่าลืมบวย ค้างอยู่เทิงแอ่ง อย่าลืมน้ำสร้างแสร่ง คันพ้อประปา
อย่าลืมหลา ฟืม กระสวย หลอดฝั้น อย่าลืมไม้ก่ำพั้น หูก กี่ คีไฟ
ลงไปไทย ไกลสวนขี๋หมิ๋น อย่าสะลืมโต่งสิ๋น อี่แม่ของเฮา
แม่นสิลืมลาบเทา กระทอกระต่า อย่าได้ลืมเฒ่าย่า พ่อคีงแม่อก
ผู้เพิ่นหย๋ำ ข้าวหมก ผู้เพิ่นจก ข้าวป้อน
ให้ลาวใซ้ได้ย้อน จักคนสองคน อย่าให้ลาวทุกข์ทน…จ่มหาเจ้า…ฯ พี่น้องเอย พ่อแม่เอ้ย ฯ

กลอนจากวัดปัจฉิมวัน