ผญา…กองทัพธรรม

ผญา…กองทัพธรรม



กองทับธรรมสิเดินได้อาศัยโยมพ่อและแม่ (นี้แล้ว) อุปถัมภ์หล่ำแล(เลี้ยง)จั่งยืนย้อนอยู่ยง
สงฆ์ส่ำเชื้อนามหน่ออริยะ อย่าสิลืมไลละเลิกลาป๋าถิ๋ม
สลักลงปานหลิ๋มพิมพ์หัวใจน้องและพี่ บริษัททั้งสี่เป็นคือเสาซ่อยค้ำลำต้นบ่โค่นแล
ขอบพระคุณแท้ๆ พ่อและแม่ผู้ใจบุญ สิบ่ขอลืมคุณค่าของคำข้าว
แม่นกายโยมชราเฒ่า แต่ศรัทธายังแสงจ้าจรัสแจ่ม ใจบ่มีสนิมแกมกะคือใจหมู่เจ้าเถิงสิเฒ่ากะแค่คีง
คาวทั้งหวานป่นปี้งเกลือปลาแดกพริกผักพาย นับว่าดีมีความหมายต่อพระสงฆ์ผู้ตรงแน่ว
บ่มีหยังสิคาแข๋วแนวได๋ๆ บ่ได้เบื่อ ฉันบ่ได้ตั้งแต่สากะเบือ นอกนั้นว่าแม่นเกลี้ยงเหมิ๊ดเสี๋ยงสู่ประการ
ขั๋วหมากพริกด้านๆ พระคุณท่านกะขบฉัน โยมให้ความสำคัญจั่งถ่อกายมาได้
ยังมีโยมถวายให้มีแรงใจสิสู้ต่อ ถือเป็นแม่เป็นพ่อ ขอเป็นลูกและเต้าซุมเจ้าแหน่เด้อ…ฯ


ยุงกะบ่ไต่ ไฮกะบ่ตอม กะปอมกะบ่ลอด แมงงอดกะบ่ซูน ยังตูนอยู่คือเก่า

พญาจากวัดปัจฉิมวัน

ข้อมูลจากวัดอีสาน.คอม